Բաժանորդագրվել

Մուտք գործել

Կամ

Չի կարող լինել դատարկ!

Չի կարող լինել դատարկ!

Գաղտնաբառի վերականգնում

Գրանցվել

Կամ

Error message here!

Error message here!

Error message here!

Մոռացել ե՞ք գաղտնաբառը։ Մուտքագրեք ձեր էլ.հասցեն եւ դուք կստանաք նոր գաղտնաբառ։

Էլ. հասցեն գրանցված չէ։

Վերադառնալ

Close

«Երկիր Զաբախա»՝ Ֆանարջյաններ

ԲԱԺԱՆՈՐԴՆԵՐԸ ԽՐԱԽՈՒՍՈՒՄ ԵՆ ԽՈՍՔԻ ԱԶԱՏՈՒԹՅՈՒՆԸ ԵՎ ՍՏԱՆՈՒՄ ՈՐԱԿ ՊԱՀԱՆՋԵԼՈՒ ԻՐԱՎՈՒՆՔ
Հետևե՛ք մեզ YouTube-ում

«Մինչև չափահաս դառնալը մեզ մոտ արմատացած էր այն գիտակցումը, որ ոչ թե հիվանդն է բժշկին վճարում, այլ հակառակը՝ բժիշկն է հիվանդին փող տալիս: Պապս՝ ակադեմիկոս Բարդուղիմեոս Ֆանարջյանը, Թումանյան փողոցի վրա գտնվող մեր տանը զննում էր հիվանդներին, դեղատոմս գրում և վերջում իր աշխատավարձից տալիս էր որոշակի դրամ, որպեսզի հիվանդը դրանով հոգա իր բուժման ծախսերը: Պապիկս մեզ համար եղել է և շարունակում է մնալ հայրենասիրության չափանիշ, և այսօր էլ եթե մեկն ինձ հարցնում է, թե ձեր քոքը որտեղից է, ես հպարտորեն նշում եմ՝ Ախալցխայից»:  

Ռուբեն ՖԱՆԱՐՋՅԱՆ

ԵՊԲՀ Նյարդավիրաբուժության ամբիոնի վարիչ, 
Առողջապահության նախարարության  գլխավոր նյարդավիրաբույժ, բ.գ.դ., պրոֆեսոր, Ֆանարջյանների տոհմի 3-րդ սերնդի ներկայացուցիչ

ՀՀ-ում ներկայումս ապրում և մասնագիտական գործունեություն են ծավալում Ֆանարջյանների՝ բժիշկների նշանավոր գերդաստանի շուրջ երեք տասնյակ ներկայացուցիչներ: Գերդաստան, որը տվել է մեծահամբավ բժիշկների արդեն 4-րդ սերունդը: Եթե այսօր Ֆանարջյանները մի հրաշքով տեղափոխվեին հայրենի Ախալցխա, ապա, համոզված ենք, երբեմնի արծաթագործների, ոսկերիչների, բրուտագործների, դարբինների և արհեստագործության մի շարք այլ ուղղությունների ներկայացուցիչների փողոցների կողքին կհիմնվեր ևս մեկ փողոց կամ համքարություն՝ Ֆանարջյան բժիշկների փողոցը:

Ֆանարջյանների հռչակավոր տոհմի նահապետն է Բարդուղիմեոս Ֆանարջյանը (1898, Ախալցխա -1976, Երևան) հայ ռենտգենաբան, ՀԽՍՀ ռենտգենառադիո-ուռուցքաբանական ծառայության հիմնադիրը, ՀԽՍՀ ԳԱ ակադեմիկոս (1956), ԽՍՀՄ ԲԳԱ թղթակից անդամ (1960), ՀԽՍՀ գիտության վաստակավոր գործիչ (1940), Հայաստանում ռենտգենոլոգիայի և ռադիոլոգիայի հիմնադիրը։ Բ. Ֆանարջյանը 1936 թվականից Երևանի բժշկական ինստիտուտի ռենտգենաբանության ամբիոնի վարիչն էր, 1946 թ.-ից՝ իր նախաձեռնությամբ կազմակերպված ՀԽՍՀ առողջապահության մինիստրության ռենտգենաբանության և ուռուցքաբանության (1977 թվականից՝ Բ. Ա. Ֆանարջյանի անվան) ԳՀԻ-ի կենտրոնի ղեկավարը։ ՀԽՍՀ ԳԱ նախագահության անդամ էր, կենսաբանական (1956-1959), բժշկական (1960-1963) գիտությունների բաժանմունքների ակադեմիկոս-քարտուղարը։

Բ. Ֆանարջյանի որդիներն են ՀԽՍՀ ԳԱ ակադեմիկոս (1982), ԽՍՀՄ ԳԱ թղթակից անդամ (1984),  ՀԽՍՀ ԳԱ փոխպրեզիդենտ, Վրացական ԽՍՀ գիտության վաստակավոր գործիչ (1980) Վիկտոր Ֆանարջյանը (1929-2003), բ.գ.թ., դոցենտ Կոնստանտին Ֆանարջյանը (ծ. 1937): Մեծ գիտնականի հարսները, թոռներն ու ծոռները, բոլորն անխտիր բժիշկներ են, ոլորտի գիտնականներ ու  խոշորագույն բուժհիմնարկների ղեկավարներ:

ԵՊԲՀ-ում առաջադեմ ուսանողներին տրվում է ակադեմիկոս Բ. Ֆանարջյանի անվանական կրթաթոշակ։

Հայրենապաշտ գիտնական Բ. Ֆանարջյանը սիրել է երկար քայլել իր հայրենի Ախալցխայում, իր պաշտելի Մարդա թաղամասում: Ախալցխացիները լավ են հիշում վերջերս քանդված  հայտնի «Ճոճվող կամուրջը» (“Качающийся мост”), որը ժամանակին կառուցել է ակադեմիկոսի հայրը՝ հմուտ արհեստավոր Արտեմ Ֆանարջյանը:

Բարդուղիմեոս Ֆանարջյանը ոչ միայն հռչակավոր գիտնական էր, այլև սեփական հայրենիքին անմնացորդ նվիրված քաղաքացի, հոգատար բժիշկ: Ինչպես նա, այնպես էլ նրա ժառանգներն ու տոհմի անդամները կարող էին ապրել և գիտական-մասնագիտական գործունեություն ծավալել առավել մեծ կենտրոններում նրանց գրկաբաց ընդունել և շարունակում են ընդունել աշխարհի ցանկացած մայրցամաքում: Այդուհանդերձ, Ֆանարջյանները որտեղ էլ որ մեկնել են ուսանելու կամ գիտական վերապատրաստումներ անցնելու, հետ են վերադարձել հայրենիք և դժվարին պայմաններում նվիրվել Հայաստանի բժշկության բազմաթիվ ոլորտների կայացմանը: Ինքը՝ Բարդուղիմեոս ֆանարջյանը, Ալ. Թամանյանի, Մ. Սարյանի և այլոց հետ Խորհրդային Հայաստան եկավ 1920-ական թթ. և լծվեց հայրենիքի շենացման գործին: Հետևելով տոհմի նահապետի պատգամներին՝ այսօր ևս Ֆանարջյան գերդաստանն իր երեք տասնյակի հասնող անվանի բժիշկներով բացառապես  ապրում և գործում է Հայաստանի Հանրապետությունում:

2003 թ. Լևոն Կանցյանի հեղինակությամբ լույս տեսավ “Լույսի և հույսի կանթեղներ” գիրքը, որտեղ մեկ առ մեկ ներկայացվում են ծնունդով Ջավախքից (Ախալցխա, Ախալքալաք և հարակից շրջաններ) մի շարք նշանավոր բժիշկների կենսագրականները: Երբեմնի մեծահամբավ հայրենակիցների գիտական ավանդույթներն ի թիվս այլոց այսօր ԵՊԲՀ-ում շարունակում է Ախալցխայի նվիրյալ զավակ, ախալցխացիների տեղաբնիկության փաստի ջատագով, երիտասարդ բժիշկ,  ԵՊԲՀ-ի աշխատակազմի ղեկավար Կարեն Հակոբյանը:

Ֆանարջյան տոհմի արմատների, տոհմի նահապետ Բարդուղիմեոս Ֆանարջյանի, նրա հռչակավոր ժառանգների ու Ախալցխայի նորօրյա սերնդի ապագայի մասին զրուցում ենք ԵՊԲՀ Նյարդավիրաբուժության ամբիոնի վարիչ, Առողջապահության նախարարության  գլխավոր նյարդավիրաբույժ, բ.գ.դ., պրոֆեսոր, Ֆանարջյանների տոհմի 3-րդ սերնդի ներկայացուցիչ Ռուբեն Ֆանարջյանի և Մ. Հերացու անվան Երևանի պետական բժշկական համալսարանի աշխատակազմի ղեկավար Կարեն Հակոբյանի հետ: 

Բեռնեք Հայկական Լրատվական Ռադիոյի հավելվածները այստեղ՝
website by Sargssyan