Բաժանորդագրվել

Մուտք գործել

Կամ

Չի կարող լինել դատարկ!

Չի կարող լինել դատարկ!

Գաղտնաբառի վերականգնում

Գրանցվել

Կամ

Error message here!

Error message here!

Error message here!

Մոռացել ե՞ք գաղտնաբառը։ Մուտքագրեք ձեր էլ.հասցեն եւ դուք կստանաք նոր գաղտնաբառ։

Էլ. հասցեն գրանցված չէ։

Վերադառնալ

Close

Թանկից էժանը ԿԱ, կամ ինչ է էկոտունը. «Կենսոլորտ»

ԲԱԺԱՆՈՐԴՆԵՐԸ ԽՐԱԽՈՒՍՈՒՄ ԵՆ ԽՈՍՔԻ ԱԶԱՏՈՒԹՅՈՒՆԸ ԵՎ ՍՏԱՆՈՒՄ ՈՐԱԿ ՊԱՀԱՆՋԵԼՈՒ ԻՐԱՎՈՒՆՔ
Հետևե՛ք մեզ YouTube-ում

30 տոկոսով ավելի էժան, երկու անգամ ավելի բարակ պատերով և նույնքան անգամ ավելի սեյսմակայուն: Երկու անգամ առավել ջերմամեկուսացված, էներգախնայող և մի քանի անգամ ավելի արագ կառուցվող բնակարանները արդեն Հայաստանում են: Սա ոչ թե «Բրիտանացի գիտնականները հայտանբերել են …» վերտառությամբ հեքիաթ է, այլ իրականություն, որից մեզ միայն բաժանում է հայկական «թանկից էժանը չկա» ասույթը: Ինչ է էկոտունը. պատմում է «Էկոտուն» ընկերության տնօրեն Արսեն Պետրոսյանը:

Հաղորդման սղագրությունը

_ Ողջո՛ւյն հարգելի ռադիոլսողներ, նաև՝ ռադիոդիտողներ: «Լրատվական ռադիո»-ի եթերում իր աշխատանքն  է սկսում «Կենսոլորտ» հաղորդումը: Տաղավարում աշխատում  է Լուսինե Հովակիմյանը: Այսօր զրուցելու ենք շատ հետաքրքիր թեմայի շուրջ. փորձելու ենք հասկանալ, թե արդյոք կա՞  «թանկից էժան» կոչվածը հատկապես՝ բնակարանների ոլորտում: Տաղավարում ինձ հյուրընկալել է «Էկոտուն» ընկերության տնօրեն Արսեն Պետրոսյանը: Ողջո՛ւյն:

_ Բարև Ձեզ:

_ Եվ շնորհակալություն՝ հրավերն ընդունելու համար:

_ Նույնպես:

_ Մեր նախնական զրույցի ընթացքում Դուք նշել եք, որ էկոտների նկատմամբ հետաքրքրությունը վերջին տարիներին աստիճանաբար թափ է հավաքում: Կարո՞ղ ենք ասել, որ շատ դեպքերում, երբ մարդիկ չեն նախընտրում էկոտունը, դա ավելի շատ հոգեբանական խնդիր է:

_ Անպայման այդպես է: Դա գալիս է Սովետական Միությունից՝ հին ստանդարտներ, հին տեխնոլոգիաներ, հին մարդիկ և հին խնդիրներ: Առաջ խնդիրներն այլ էին՝ ոչ էներգիայի հետ կապված, իսկ հիմա խնդիրը հենց էներգիան է, որը պետք է խնայել, և բյուջեն է, որը նույնպես պետք է խնայել՝ թե՛ տուն ձեռք բերելու, թե՛ ջեռուցելու, թե՛ հովացնելու համար: Էկետունն այդ խնդիրների համալիր լուծումն է՝ և՛ էկոնոմիկայի, և՛ մարդկանց ֆինանսական վիճակին համապատասխան:

_ Էկոբնակարանի պարագայում որքա՞ն է 1 քմ-ի գինը:

_ Գինը, ներառյալ ամենաբարձր կոմպլեկտացիայով աշխատանքները, կազմում է 570 դոլար:

_ Սովորական բնակարանաշինության գներից  մոտավորապես որքա՞ն  է ցածր:

_ Կարելի է համեմատել առանց վերանորոգման բնակարանների հետ, որի 1 քմ-ի արժեքը սկսվում է 800 դոլարից: Մեզ մոտ այդ գնով կարելի է առանձնատուն ձեռք բերել՝ ներառյալ հողատարածքի գինը, և արդյունքում ստանալ էներգախնայող և վերանորոգված առանձնատուն՝ պաստրաստ բնակվելու համար, մինչդեռ բնակարանի վրա պետք է ավելի ծախսեր անել՝ այն բնակվելու ենթակա դարձնելու համար:

_  Փորձենք հասկանալ՝ Հայաստանում նման շինարարություն սկսելու միտքը, գաղափարն ինչպես է առաջացել  Ձեզ մոտ:

_ Դա մոտ 15-20 տարվա պատմություն ունի, երբ սկսեցինք արտադրել էկոսալեր. դա պատրաստված է հիմնականում բնական քարերի հանքօգտագործման թափոններից. դրանք պահելը և իրացնելը նույնպես խնդիր է, մենք այդ թափոնները դարձնում ենք շատ պիտանի, էկոլոգիապես մաքուր շինանյութ, որից էլ պատրաստում ենք էկոտները: Բացի այդ, մեր աշխարհագրական դիրքի համար շինանյութերից ամենանպաստավորը պեռլիտն է: Էկոտներ ստանալու համար կան շատ տարբեր տեխնոլոգիաներ, այստեղինը հենց փքապեռլիտն է, որը նաև պետք էր կատարելագործել, որ աշխատի դրսի ագրեսիվ պայմաններում: Պեռլիտը շատ նուրբ նյութ է, որը ներսում աշխատում է, բայց դրսի պայմաններին շատ դժվար է դիմանում.այդ հարցը պետք էր լուծել, և մենք լուծեցինք կարծրացնելու տեխնոլոգիայի շնորհիվ:

_ Ո՞ր հանքերի հումքային  մնացորդներն  են Ձեզ համար որպես հումք ծառայում:

_ Տրավերտին, ֆելզիտ, բազալտ, մարմար, տուֆ. բոլոր քարերը, որ Հայաստանում կան, օգտագործվում են, դրանց թափոններն ապահովում են էկոտների երեսպատման դեկորատիվ տեսքը:

_ Այսինքն՝ Դուք հանքերի, կազմակերպությունների հետ ոչ թե ունեք պայմանագրեր, որ նրանք այդ թափոնները տրմադրեն շինարարական նպատակներով, այլ դրանք ազատ հասանելիություն ունեն և կարողանում եք հեշտությամբ ձեռք բերել:

_ Այդ թափոնը վերածվում է ավելի դիմացկուն երեսապատման սալիկի, քան՝ բնական քարը, քանի որ այն ունի հիմնային հիմքի վրա բնական պաշտպանիչ հավելանյութեր, ինչը եռակի ավելացնում է շինության արտաքին տեսքի կյանքի տևողությունը.  բնակարան քարերի հետ համեմատած՝ չի կեղտոտվում, անձրևաջրերը վանում է, ծուխ, փոշի  և այլն, արտաքին տեսքը երկար ժամանակ մնում է շատ վառ, ինչպես նոր կառուցած տունը:

_ Պոտենցիալ գնորդին էկոտուն ձեռք բերելու հնարավորությունը ներկայացնելիս՝ ի՞նչ խնդիրների եք բախվում: Հիմնականում ի՞նչ պատճառով են նրանք հրաժարվում այդ առաջարկից:

_ Հիմնականում այդ խնդիրը ծագում է կարծրատիպեր ունեցող մարդկանց մոտ, ովքեր սովոր են հաստ պատերով ծանր, պանելային շինություններին և այլն: Մենք այդ տեխնոլոգիաները վաղուց համարում ենք ժամկետանց, ոչ արդիական, օգտագործում ենք միայն երկաթբետոնե կարկասի տեխնոլոգիան (հնուց միայն դա է մնացել), և այդ ամուր հիմքի վրա ավելացնում ենք միայն մեր էկոպատերը, որոնք շատ թեթև են, և շենքը, նույն կմախքը, նույն կրողունակությունն ունենալով, մոտ 3 անգամ ավելի քիչ է բեռնվում, որից տան կմախքի կյանքը երկարում է մոտ 2 անգամ, և ավելի համարյա կրկնակի սեյսմակայուն է դառնում:

_ Փորձենք հասկանալ՝ ովքե՞ր են Ձեր պոտենցիալ գնորդները:

_ Կարելի է ասել՝ բոլորը:

_ Նկատի ունեմ՝ մարդը պետք է մի փոքր ավելի ինտելեկտուալ հագեցած լինի, որ կարողանա հասկանալ:

_ Կարելի է համեմատել այն հին՝ կոճակներով հեռախոսը նոր հեռախոսների հետ: Հինը օգտագործողները, բնականաբար,  էլի շատ դժվարությամբ կանցնեն նոր հեռախոսներին, որոնք ավելի լավն են, քան՝ նոր սերունդը, նորը տեսած, զգացած մարդիկ:

_ Դուք ինչ-որ աշխատանքներ տանո՞ւմ եք այն ուղղությամբ, որ հանրությունն ավելի տեղեկացված լինի, թե ինչ է իրենից ներկայացնում էկոտունը: Երբ հաճախորդը դիմում է Ձեզ (քանի որ Ձեր ընկերությունն ավելի լայն՝ շինարարական ընկերություն է), ինչպե՞ս եք Դուք նրանց ներկայացնում, որ կարող են այսպիսի բնակարաններ ձեռք բերել:

_ Ճիշտն ասած, դեռ այդպես չենք գովազդում, քանի որ դեռ 1-2 տարի է, ինչ էկոտները կառուցում են, և այդքան մեծ կարիք չկա: Բայց արդեն հասել է գովազդելու պահը: Հիմա գործում է միայն կայքը՝ ecotun.am, որն ինչ-որ չափով կարող է բավարար պատասխան տալ մարդկանց հարցերը: Էկետունը որպես պրոդուկտ մշակելով՝ մենք մտածել ենք այնպես անել, որ լիովին բավարարենք տուն գնել ցանկացողի բոլոր պահանջները՝ սկսած նախագծային, թղթաբանական, հող ընտրելու և ձեռք բերելու աշխատանքներից: Փաթեթը տրամադրելիս՝ մենք նրանց ընձեռում ենք ինտերիերի շատ մեծ հնարավորություն, ոչ շաբլոն, այլ ժամանակակից շատ տարբերակներ, որպեսզի մրցունակ լինի այլ տների հետ: Բացի այդ, էկոտներն ավելի արագ են կառուցվում:

_ Ի դեպ, տարբերություն կա՞ քարե շինությունների և էկոտների արտաքին տեսքի միջև:

_ Գնորդը դժվար թե տարբերություն գտնի. դա ներսից կարող եք զգալ, երբ մտնեք ներս և տեսնեք, որ պատերը սովորական տներից 2 անգամ բարակ են:

_ Եվ շեշտենք, որ ավելի սեյսմակայուն են :

_ Ավելի սեյսմակայուն և ավելի ջերմամեկուսիչ են:

_ Փորձենք հասկանալ էկոտուն ասվածն իր բնապահպանական տեսանկյունից, ինչ է ենթադրում այդ «էկո» բաղադրիչը: Բնապահպանական տեսանկյունից ի՞նչ օգուտ ունի, մի փոքր դրույթներով առանձնացրեք:

_ Առաջինը, ավելի գլոբալ է. դա էներգակիրների օգտագործման նվազեցումն է:

_ Այսինքն՝ գազ, լույս և այլն:

_ Այո, և դա շատ կարևոր է ներկայիս էկոնոմիկայի պայմաններում ապրող ժողովրդի համար: Դա նպաստում է բանկի ամսական մարումներին, ինչը շատ թեթևացնում է վարկառուների հոգսը՝ ջեռուցման համար ամսական վճարելով, ասենք, 30.000 դրամ՝  100.000-ի փոխարեն: Բացի դրանից, էկոտների հիմնական շինանյութը կազմող էկոպատերը՝ երեսպատումով, ներքնապատումով, ներսի պատերը, ամբողջը կազմված է մեր տեղական հումքից՝ պեռլիտից, երեսպատուման համար, ինչպես շեշտեցի, օգտագործում ենք միայն բնությունն աղտոտող թափոնները, որոնք էկոլոգիապես մաքուր են, թունավոր նյութեր չեն պարունակում, անվտանգ են և, բացի էկոլոգիայի օգուտից, նաև գրպանին են օգուտ տալիս:

_Դուք հաղորդման առաջին հատվածում նշեցիք, որ նրանք նաև ավելի հեշտ ջերմամեկուսացնող են. էներգախնայողությունն ավելի շատ հենց ջերմամեկուսացմա՞ն հաշվին է տեղի ունենում, թե՞....

_ Այո, էներգախնայողությունն ապահովվում է ջերմամեկուսացման շնորհիվ, ստանում ենք ամենաօպտիմալ ջերմամեկուսացումը՝ և՛ շոգից, և՛ ցրտից պաշտպանվելու համար, երկուսը նման, բայց մի քիչ տարբեր մոտեցումներ են պահանջում:

_ Արսեն, փորձենք նաև հասկանալ, թե Հայաստանում որտեղ է ավելի մեծ պահանջարկ՝ Երևանո՞ւմ, թե՞ մարզային հետաքրքրվածություն նույնպես կա:

_ Պահանջարկը հիմնականում Երևանում է՝ կախված բանկերի ֆինանսավորումից. Երևանի նկատմամբ ավելի կողմնապահ են, քանի որ Երևանում գույքն ավելի լիկվիդային է և նպատակահարմար է գրավադրման համար: Այդ պատճառով պատվերները հիմնականում Երևանում են կամ Երևանին շատ մոտ:

_ Մարզային հետաքրքրվածությամբ կա՞ մի տեղ, որն առանձնանում է:

_ Կա:  Ներկա պահին լիկվիդայնությամբ երկրորդ տեղը զբաղեցնում է Դիլիջանը, որտեղ բանկերը զարգանալու համար հեռանկար են տեսնում: Այնտեղ սկսել են շատ աշխատել հանգստյան տների կամ առանձնատների ուղղությամբ:

_ Հետաքրքիր է, թե սփյուռքահայերի կողմից կա՞ հետաքրքրվածություն: Իմ ինտուիտիվ կարծիքով իրենք ավելի հետաքրքրված կլինեն էկոպրոդուկտով, քանի որ արտասահմանում բավականաչափ պրոպագանդվող է:

_ Բնականաբար, կլինեն, քանի որ նրանք, ովքեր դրսից ուզում են գալ Հայաստան հիմնական բնակության համար, գալիս են, նայում, ուսումնասիրում շուկան և ընտրում են առաջինը՝ ֆինանսապես ամենահասանելին, ապա նայում են որակական հատկանիշները՝ երկարաժամկետ հեռանկարով: Եվ, ինչպես ասացի, ընտրությունն ընկնում է մեզ վրա:

_ Ի դեպ, Հայաստանում, կարծես թե, միայն դուք եք առաջարկում էկոբնակարաններ, և կարծում եմ՝ շուկան ուսումնասիրած կլինեք: Ինչո՞ւ ձեզ հաջողվում է վաճառել էկոբնակարան, իսկ մյուս կազմակերպություներին՝ չի հաջողվել:

_ Որովհետև մենք, ուսումնասիրելով շուկան, հասկացել ենք, որ պետք է ապրանքն ավելի մատչելի ներկայացնել մարդկանց, և ապրանքի կոմպլեկտացիան պետք է համապատասխանի գնորդի պահանջներին, լիովին բավարարի նրա պահանջները, ցանկությունը, որ գնորդը ոչ մի այլ գործ չանի, բացի՝ գնելուց: Մենք ծառայությունը մատուցում ենք ամբողջությամբ պատրաստ, լիովին կազմակերպած՝ և՛ թղթաբանական աշխատանքները, և՛ նախագծային, և վերջում վկայականը հանձնում ենք պատվիրատուին:

_ Փաստորեն այլ կազմակերպությունների մոտ չի ստացվել, քանի որ...:

_ Այլ  կազմակերպություններ չեն կարողացել ճիշտ փաթեթ կազմել, որի  գինը ձեռնտու լինի. ինչ-որ մասեր փոխարինել են այլ՝ ներմուծվող մասերով, որը բարձրացրել է  ինքնարժեքը, և գինը բարձր է ստացվել: Մեզ մոտ ամեն ինչը տեղական է, բացի ներքին հարդարման ինչ-որ պարագաներից, որոնք Հայաստանում չեն արտադրվում:

_ Այս ընթացքում, ինչ սկսել եք էկոբնակարաններ կառուցել, քանի՞ շինություն կա ձեր հաշվարկում, քանի՞սն եք կառուցել:

_Անցյալ տարվա ցուցանիշը կարող եմ ասել՝ մոտ 16 տուն. բնակիչները գոհ են, ինչն ամենակարևորն է, ինքնստինքյան գովազդ է ստացվում: Ամեն մի գոհ հաճախորդ իր ծանոթ-բարեկամներին խորհուրդ է տալիս նույնպես ձեռք բերել  էկոտուն:

_ Այսինքն՝ ձեր հաճախորդները հաճախորդներ են բերում:

_ Հիմա հիմնականում այդպես շղթայակն է լինում:

_ Արսե՛ն, նաև փորձենք ճշտել, արդյո՞ք էկոբնակարանի կառումը տալիս է ինչ-որ սահմանափակումներ շենքի կառուցվածքի հարցում, օրինակ՝ եթե բնակարանը էկո է, չի կարող որոշակի հարկերից բարձր լինել: Կա՞ն ինչ-որ սահմանափակումներ:

_ Բացարձակապես կառուցողական կամ տեխնիկական ոչ մի խնդիր չի առաջացնում, ընդհակառակը, ավելի թեթև է, կարելի է ավելի բարձր սարքել, ավելի մեծ, ավելի աբստրակտ, hi-tech ոճով, մտքի ցանկացած թռիչք կարելի է օգտագործել էկոտան տեխնոլոգիայով:

_ Ձեր կառուցած ամենաբարձրահարկը ո՞րն է եղել:

_ Մենք հիմնականում 2-3 հարկանի առանձնատներ ենք կառուցում, պատվիրատուներին էլ ի սկզբանե խորհուրդ ենք տալիս մի բարձրահարկի փոխարեն շատ առանձնատներ պատվիրել, քանի որ դա գնորդի համար էլ է ձեռնտու կապիտալ. նույն գնով էկոտուն ձեռք բերելով՝ մոտ 2 անգամ ավելի օգուտ կստանան, քան՝ բնակարան գնելիս:

_ Ի դեպ, փորձենք գնային քաղաքականությունը հասկանալ. արդյոք էկոտների գնային քաղաքականությունը կապ ունի՞ սովորական բնակարանաշինության գների տատանումների հետ:

_ Անպայման: Բանկային ֆինանսավորման հնարավորությունները մեծացնում է, քանի որ գինը ցածր է, իսկ շուկայական արժեքը՝ բարձր, տունը շատ լիկվիդային արժեք ունի, կարելի է ասել՝ վաճառվում է լիկվիդային գնից ցածր կամ լիկվիդայինին շատ մոտ գնով, որը շատ մրցունակ է այլ շինությունների վարկավորման հետ: Եվ դա թույլ է տալիս նորեկներին՝ թե՛ սփյուռքահայերին, թե՛ ներգաղթողների, թե՛ փախստականների, նեղ բյուջեով լուծել բնակարանի հարցը: Բայց դա չի բացառում, որ նաև ունևոր զանգվածը կօգտնվի նույն պայմաններից. դա նույն որակական ապրանքն է լինում թե՛ գումար ունեցողի, թե՛ քիչ գումար ունեցողի համար:

_ Փաստորեն հասկանալ, թե հենց շինարարական կազմակերպության համար ֆինանսական տեսանկյունից որքանո՞վ է ձեռնտու զբաղվել էկոշինարարությամբ: Կոնկրետ Ձեր շինարարական ընկերության պարագայում ընկերության եկամտի քանի՞ տոկոսն է ստացվում էկոբնակարաններից: Թե՞ սա ավելի շատ կողքից եկամուտ է, քան՝ հիմնական:

_ Մենք ադապտացվում ենք Հայաստանի անկայուն էկոնոմիկային և շուկայի տատանումներին, բոլոր գործոններին (արտարժույթն էլ մեծ դեր է խաղում), որպեսզի մեր գործը շարունակվի: Այդ ադապտացիան բերել է նրան, որ մենք արդեն լիովին  անցել ենք էկոտների կառուցման աշխատանքներին և, օրինակ, արտադրությունն անցել է 4-5-րդ պլան, որովհետև շինանյութի արտադրության համար հաստատուն շուկա է պահանջվում. շինանյութի արտադրությունը  շատ խոցելի ոլորտ է և պահանջում է լավ ու հաստատուն շուկա:

_ Փորձենք նաև մի փոքր հասկանալ համաշխարհային տենդենցներին հետևելու ձեր ցանկության մասին: Կա՞ն տեխնիկական ինչ-որ խնդիրներ, որոնք Հայաստանում իրականացնել դժվարանում եք, կամ ինչ-որ տեխնիկական նորամուծություններ, որ արտերկրում հետևելով՝ փորձում եք բերել մեզ մոտ: Ո՞րն է ձեր ընկերության տեսլականը, և հատկապես՝ էկոբնակարանների ավելի հանրայնացումը մեր երկրում:

_ Արդեն անցել է 2 տարի, ինչ սկսել ենք արտադրել էկոտներ, և Հայաստանում նորություններ ենք ներդրել, քանի որ կան երկրներ, որոնք արդեն 30-40 տարի օգտագործում են այդ տեխնոլոգիաները, բայց, չգիտես ինչու, Հայաստանում չեն էլ լսել դրանց մասին. շատ պարզունակ տեխնոլոգիաներ են, բայց շատ՝ էֆեկտիվ, որոնք շատ հարցեր կլուծեն այս ճգնաժամի պայմաններում:

_ Հարցն այսպես փորձեմ ձևակերպել. արտերկրում կա՞ն տեխնոլոգիաներ, որոնք Հայաստանում էկոշինարարության ոլորտում կիրառելու համար ինչ-որ դժվարություններ են առաջացնում, թե՞ էկոշինարարությունը նույնն է ամենուր, և նման խնդիրներ չկան:

_  Կոնրետ էկոշինարարության համար ոչ մի խնդիր չի առաջանում, ուղղակի մենք մեր առջև կատարելագործման առաջադրանք են դրել, որ ամեն նոր էկոտունը պետք է ինչ-որ նոր բանով ավելի լավը լինի, քան՝ նախկինը:

_ Արսեն, շինարարությունը լայն հասկացություն է. արդյո՞ք էկոշինարարությունը վերաբերում է միայն բնակարանաշինությանը, թե՞ այլ կառույցներ նույնպես կարող են լինել:

_ Բազմաբնակարան շենքերը, դպրոցները, մանկապարտեզները, շենքային ցանկացած հաստատություն կարելի է փոխարինել էկոտնով:

_ Միայն շենքային հաստատություները:

_ Այո: Բացի դրանից, նաև գյուղնշանակության օբյեկտները՝ թե՛ տներ գյուղացիների համար, թե՛ գոմեր: Բնականաբար, բոլոր ամենուր կա էներգիայի խնայման, էժանության խնդիր,  որը գնորդների համար կրկնակի կավելացնի հասանելիությունը:

_ Եվ վերջում, երևի թե փորձենք խոսել ձեր առաջիկա քայլերի մասին. ի՞նչ եք անելու ընկերության ծավալներն ավելի մեծացնելու համար: Նաև Ձեր ուղերձը հասարակությանը առ այն, թե ինչու պետք չէ վախենալ և ինչու պետք է շահագրգռված լինել էկոտուն ձեռք բերելու հարցում:

_ Այդ հարցը տարբեր պատասխաններ կարող է ունենալ, բայց հիմա շեշտեմ ամենակարևորը. դա շուկայի ներկայիս հոսքի մաքսիմալ ապահովումն է, փորձում ենք հիմնականում արտերկրից ժամանած ներգաղթյալներին և սփյուռքահայերին ինֆորմացիան հասցնել հայերեն, ռուսերեն, անգլերեն, որպեսզի նրանք կարողանան կողմնորոշվել, զգալ տարբերությունները, օգուտը և պատվիրել էկոտունը:

_ Եվ ձեր քայլերի մասին. երևի հաջորդաբար պետք է ընկերության արտադրական ծավալներն ավելի մեծացնել:

_ Այո, արտադրական ծավալները դեռևս այդքան մեծ չեն, դրա համար շատ չի գովազդվում, կարելի է ասել՝ ընդհանրապես գովազդ չի արվում, այդ պատճառով մենք սպասում ենք մեր արտադրական ծավալների մեծացմանը, հետո արդեն կսկսենք բուռն կերպով գովազդել և տարածել էկոտների զարգացումը, շուկա մտցնել:

_ Եվ վերջում մի հարց, որն ընթացքում բաց թողեցի. արդյո՞ք կա խնդիր, թե որտեղ կարելի է կառուցել էկոտուն, որտեղ՝ ոչ: Այսինքն՝ էկոտուն կարելի՞ է կառուցել ամենուրեք, թե՞ կան կոնկրետ դիրքային պայմաններ, որ անհրաժեշտ են շինարարության համար:

_ Էկոտունը կարելի է կառուցել այնտեղ, որտեղ կարելի է կառուցել ցանկացած այլ շինություն, նույնիսկ այնպիսի տեղերում, որտեղ չի կարելի կառուցել ցանկացած շինություն: Էկոտունը կառվում է շատ արագ (պատվիրատուները մոտ 5 ամսում արդեն կարող են բնակվել այդ տանը), առանց ավելորդ ծախսերի՝ հասցնում ենք շենքը կառուցել ամենալավ եղանակային պայմաններում և հանձնել  շահագործման: Այս հանգամանքը ևս ավելի մրցունակ է դարձնում էկետներն այլ ընկերությունների շենքերի համեմատ, որոնք կառուցվում են 1-2 տարում:

_ Շատ լավ, Արսեն, շնորհակալ եմ անչափ: Կարծում եմ՝ հաղորդումը նույնպես կնպաստի, որպեսզի մարդիկ ավելի տեղեկացված լինեն, թե ինչ է էկոտունը: Կարծում եմ՝ նաև մեր տնտեսության համար է բավականաչափ կարևոր էկոտների հանրայնացումը: Շնորհակալություն ևս մեկ անգամ հրավերը չմերժելու համար:

_ Ես նույնպես շնորհակալ եմ հետաքրքրվելու համար:

_ Հիշեցնեմ՝ լսում կամ դիտում էիք «Կենսոլորտ» հաղորդումը: Տաղավարում աշխատեց Լուսինե Հովակիմյանը: Իմ հյուրն էր «Էկոտուն» ընկերության տնօրեն Արսեն Պետրոսյանը: Ցտեսություն:

_ Հաջողություն Ձեզ:

Բեռնեք Հայկական Լրատվական Ռադիոյի հավելվածները այստեղ՝
website by Sargssyan