09:32   13-01-2021
Image Description
Նախկին տիեզերագնացը դարձել է Կանադայի ԱԳՆ ղեկավար

Կանադայի վարչապետ Ջասթին Թրյուդոն կառավարությունում կադրային փոփոխություններ է կատարել՝ արտաքին գործերի նախարար նշանակելով տիեզերքում եղած առաջին կանադացուն:

Թրյուդոն այս քայլին գնացել է գարնանը հնարավոր ընտրություններից առաջ: Նախկին տիեզերագնաց Մարկ Գարնոն դարձել է արտաքին գործերի նախարար, իսկ ներկայիս արտաքին գործերի նախարար Ֆրանսուա-Ֆիլիպ Շամպանը՝ ինովացիաների, գիտության եւ արդյունաբերության նախարար:

Թրյուդոն ասել է, որ կաբինետում կարեւոր պաշտոնները պետք է զբաղեցնեն այն նախարարները, ովքեր մտադիր են իր կողքին երկար մնալ եւ ովքեր կարող են ներկայացնել կառավարության օրակարգը հաջորդ ընտրարշավի ընթացքում:

Թրյուդոյի Լիբերալ կուսակցությունը հաղթել է 2019-ի ընտրություններում, բայց խորհրդարանում մեծամասնություն չունի եւ իշխանությունը պահպանելու համար պետք է ապավինի առնվազն մեկ ընդդիմադիր կուսակցության:

Վերլուծաբանների կարծիքով՝ հաջորդ դաշնային բյուջեի շուրջ հավանական վեճերը կարող են գարնանը համընդհանուր ընտրությունների պատճառ դառնալ։

Գրում է News.am -ը:


Loading...