Ակնկալում ենք, որ Լոնդոնում Ադրբեջանի դեսպանատան դեմ սադրանքը մանրամասն կհետաքննվի, եւ այդ սադրանքն իրականացրած անձինք պատասխանատվության կենթարկվեն։ Այս մասին լրագրողներին ասել է Ադրբեջանի ԱԳՆ մամուլի ծառայության ղեկավար Լեյլա Աբդուլաեւան, փոխանցում են ադրբեջանական ԶԼՄ-ները։
Աբդուլաեւայի խոսքով՝ Մեծ Բրիտանիայում Ադրբեջանի դեսպանատան վրա հարձակվել են արմատական կրոնական խմբավորման անդամներ, եւ այդ միջադեպը լրջագույն հարց է բարձրացնում դիվանագիտական ներկայացուցչության անվտանգության մասին։
«Եւս մեկ անգամ հիշեցնում ենք, որ դիվանագիտական ներկայացուցչությունների, այդ թվում՝ դիվանագետների անվտանգությունը պետք է ապահովի ընդունող երկիրը՝ միջազգային պարտավորություններին համապատասխան։ Այդ առումով հատկանշական է, որ բրիտանացի նախարարը որպես առաջնահերթ խնդիր նշել է դիվանագիտական անձնակազմի անվտանգությունը։ Ինչ վերաբերում է «կարծիքի ազատություն» արտահայտմանը, ապա ազատ հասարակությունում այդ սկզբունքի կիրառման ուղիները/կանոնները, որոնք կապ չունեն Լոնդոնում մեր դեսպանատան վրա հարձակման հետ, հավանաբար լավ հայտնի են Բրիտանիայի համապատասխան կառույցներին, որը հին արեւմտյան ժողովրդավարությունն է։ Հակառակ դեպքում «ազատություն» արտահայտության քողի տակ ցանկացած արմատական եւ անօրինական գործողությունների մեկնաբանում կարող է լուրջ խնդիրներ առաջացնել երկրի անվտանգության համար»,- ասել է նա։
