Գեղարքունիքի մարզի Սեւան համայնքի Լճաշեն գյուղում ՀՀ կառավարության կողմից 2022 թվականին իրականացվող սուբվենցիոն ծրագրերի շրջանակներում հիմնանորոգվում են թիվ 2, թիվ 23 փողոցները եւ առաջին փողոցի մի հատված։
Ինչպես «Արմենպրես»-ին տեղեկացրեց Լճաշենի վարչական ղեկավար Վահան Մարգարյանը, ծրագրի պայմանագրային արժեքը կազմում է 134 միլիոն 633 հազար դրամ, որի 50 տոկոսը հատկացնում է ՀՀ կառավարությունը, 50 տոկոսը՝ Սեւանի համայնքապետարանը։ Հիմնանորոգվող ճանապարհների ընդհանուր մակերեսը կազմում է 9816 քառակուսի մետր։ Շինարարական աշխատանքները մեկնարկել են այս տարվա օգոստոս ամսից։ «2022 թվականի սեպտեմբերի 23-ի դրությամբ արդեն տեղադրվել են բոլոր մայթերի եզրաքարերը, ավարտվել է մայթերի ասֆալտապատումը, ավարտին է մոտենում ջրահեռացման համակարգի կառուցումը, հեռացվել է ասֆալտբետոնյա հին շերտը, տեղադրվել է խճաքարային հիմքը, ճանապարհները նախապատրաստված է ասֆալտապատման, որը կսկսվի առաջիկա օրերի ընթացքում»,-ներկայացրեց Լճաշենի վարչական ղեկավարը։