Կառավարության կողմից առաջարկվող Կորոնավիրուսի տնտեսական հետևանքների չեզոքացման ծրագրերը խճճված են, ձեռնարկատերը դրանցից որևէ մեկն ընտրելու դեպքում պետք է անցնի բարդ ընթացակարգ: Բյուրոկրատական քաշքշուկներից ու երկար թղթաբանությունից զատ կա ավելի լուրջ խնդիր՝ Կառավարությունը ոչինչ չի առաջարկում այն տնտեսվարող սուբյեկտներին, որոնք որոշ ժամանակ առաջ ինչ-ինչ պատճառով դարձել են ոչ պարտաճանաչ հարկատու: «Մարքեթինգի Հայկական Ասոցիացիայի» նախագահ Արամ Նավասարդյանի խոսքով, առաջարկվող ծրագրերը հավանական է, որ շատերին կօգնեն ոտքի հանել իրենց բիզնեսը, սակայն կա ավելի կարճ տարբերակ: Կառավարությունը կարող էր երկար ու բարդ ծրագրեր մշակելու փոխարեն պարզապես հարկատուներին վերադարձնել իրենց իսկ վճարած հարկը: