Թաիլանդում «Կխաույայ» ազգային պարկի աշխատակիցները շրջակա միջավայրի աղտոտման դեմ պայքարի ուրույն մեթոդ են մշակել. նրանք ծրագրում են փոստով զբոսաշրջիկներին ուղարկել զբոսանքից հետո իրենց հետևից այգու տարածքում թողած աղբը, գրում է BBC-ն:
Աղբյուրը մանրամասնում է, որ զբոսաշրջիկները նախքան այգի այցելությունը ստիպած կլինեն իրենց տվյալները թողնել աշխատակիցների մոտ: Երկրի շրջակա միջավայրի նախարար Վարավութ Սիլպա-արչան հայտարարել է, որ այս եղանակով ավելի հեշտ կլինի գտնել բնությունն աղտոտողներին:
Նշվում է, որ նախատեսվում է տեսախցիկներով հետևել աղտոտողներին, հետո հավաքել թողնված աղբը, այդ թվում՝ ապրանքների մնացորդները և ծանրոցներով դրանք զբոսաշրջիկների տան հասցեով ուղարկել:
Հայտնի է, որ առաջին ծանրոցն արդեն պատրաստ է: Դրան կից ամրացված է տեքստ, որում ասվում է. «Մոռացել եք սա «Կխաույայ» ազգային պարկում»:
Նախարարը հավելել է նաև, որ այգում աղբ նետելու համար կարող են նաև քրեական պատասխանատվության ենթարկել. նշվում է, որ իրավախախտին կարող է մինչև 5 տարվա ազատազրկում սպառնալ:
Հայտնի է, որ «Կխաույայ» ազգային պարկը 2168 քմ տարածք ունի, այստեղ 67 տեսակի կաթնասուն և 320 տեսակի թռչուն կա, որոնց կյանքին մարդկանց թողած աղբը կարող է մեծ վնաս հասցնել:
Գրում է՝ Tert.am-ը: