Եվրամիության կողմից Բելառուսի նախագահ Ալեքսանդր Լուկաշենկոյի վերընտրման օրինականությունը չճանաչելը չի նշանակում, որ Բրյուսելը չի աշխատի նրա հետ: Այս մասին սեպտեմբերի 21-ին հայտարարել է ԵՄ դիվանագիտության ղեկավար Ժոզեպ Բորելը, գրում է eadaily.com կայքը:
«Այն փաստը, որ մենք այստեղ ժողովրդավարական լեգիտիմություն չենք տեսնում, չի նշանակում, որ մենք չենք հասկանում` ինչ իրողություններ կան», -հայտարարել է Բորելը:
Նրա խոսքերով` ԵՄ-ում հասկանում են «նրանց (Բելառուսի իշխանությունների) հետ աշխատելու անհրաժեշտությունը»:
Միևնույն ժամանակ, նա նշել է, որ ստեղծված իրավիճակում պաշտոնական Մինսկի հետ շփումները քաղաքական մակարդակով, ինչպես նաև Արևելյան գործընկերության շրջանակներում կարող են պակաս ինտենսիվ լինել, քան նախկինում: Բորելն ընդգծել է, որ ԵՄ-ի մոտ նման իրավիճակ է ստեղծվել նաև Վենեսուելայի պարագայում, որտեղ Եվրամիությունը Նիկոլաս Մադուրոյին չի ճանաչում որպես երկրի օրինական ղեկավար, բայց շարունակում է հնարավորինս աշխատել նրա հետ:
Բացի այդ, Բորելը հիշեցրել է, որ ԵՄ բոլոր արտգործնախարարները համարում են, որ Բելառուսում օգոստոսին կայացած նախագահական ընտրությունները կեղծված են և չեն ճանաչում դրանց արդյունքները:
Գրում է՝ Tert.am -ը:
