19:00   24-02-2021
Image Description
Հայ և հրեա ժողովուրդների եղեռնի զոհերի հուշարձանի մոտ տեղի է ունեցել հանդիսավոր արարողություն
Թողնել մեկնաբանություն

Երևանի Օղակաձև զբոսայգում գտնվող հայ և հրեա ժողովուրդների եղեռնի զոհերի հիշատակը հավերժացնող հուշարձանի մոտ կազմակերպվել է հանդիսավոր արարողություն, որի նպատակը ևս մեկ անգամ կոթողի խորհուրդը վերաարժևորելն էր: Ինչպես «Արմենպրես»-ին հայտնեցին Երևանի քաղաքապետարանի աշխատակազմի տեղեկատվության և հասարակայնության հետ կապերի վարչությունից, միջոցառմանը ներկա են գտնվել Երևանի կենտրոն վարչական շրջանի ղեկավար Ավետ Պողոսյանը, Հայաստանի հրեական համայնքի նախագահ Ռիմա Վարժապետյան-Ֆելլերը, համայնքի այլ ներկայացուցիչներ: 

Հաղորդագրության մեջ նշվում է, որ վերջերս անհայտ անձինք պղծել էին հուշարձանը,  Կենտրոն վարչական շրջանի աշխատակազմի ուժերով այն արագորեն մաքրվել էր և բերվել նախկին տեսքի: 

«Այս հուշարձանը միավորում է զրկանքներ կրած երկու ժողովուրդների, և մենք, որպես այդ ժողովուրդների ներկայացուցիչներ, պետք է ամեն ինչ անենք, որ այդ արհավիրքն այլևս երբեք չկրկնվի: Հայաստանը բաց է ազգային բոլոր փոքրամասնությունների համար, և ես ևս մեկ անգամ հավաստում եմ մեր բարեկամությունը հրեա ժողովրդի հետ»,- նշել է Կենտրոն վարչական շրջանի ղեկավար Ավետ Պողոսյանը:

Հայաստանի հրեական համայնքի նախագահ Ռիմա Վարժապետյան-Ֆելլերն էլ իր հերթին շնորհակալություն է հայտնել քաղաքային իշխանությանը՝ արատավոր այդ երևույթը դատապարտելու և խնդրին արագորեն արձագանքելու համար: 

Ներկաները ծաղիկներ են խոնարհել հուշարձանին և հարգանքի տուրք մատուցել հայ և հրեա ժողովուրդների եղեռնի զոհերի հիշատակին: 

Loading...