2021 թվականի դեկտեմբերից մինչ օրս Աջափնյակում ապօրինի շինությունների վերաբերյալ իրավախախտման վարչական 60 արձանագրություն է կազմվել, որոնցից 45-ը՝ համայնքային հողամասերի վրա, իսկ 15-ը՝ սեփական: Քանդում և ապամոնտաժում է իրականացվել 34 հասցեներում:
«Արմենպրես»-ի հաղորդմամբ՝ այս մասին հունիսի 22-ին Երևանի ավագանու 6-րդ նստաշրջանի 5-րդ նիստին հայտնեց Երևանի քաղաքապետ Հայկ Մարությանը:
«Ապամոնտաժվել է 34 կրպակ, շինություն, խանութ և այլն, բայց նման շինությունների քանակը շատ մեծ է: Վարչական շրջանների ղեկավարները նամակներ են ուղարկել ՀՀ գլխավոր դատախազին, ԱԱԾ տնօրենին, ոստիկանապետին: Նամակներում կետ առ կետ նկարագրված է, թե ինչպես են գործում ապօրինի շինարարություն իրականացնող խմբավորումները, որոնք տարբեր պետական մարմիններից, դատական համակարգից են, թաղային հեղինակություններ են: Մեծ խմբավորում է, և մենք մեր լիազորությունների շրջանակում ամեն ինչ անում ենք, բայց ամենակարող չենք. անգամ մեր աշխատակիցների կյանքին կարող է վտանգ սպառնալ»,-ընդգծեց քաղաքապետը:
Նրա հավաստիացմամբ՝ այս ամենը երկար չի շարունակվելու, իրենք կտրուկ գործողություններ են իրականացնելու և իրավական առումով ուժեղ են լինելու:
