18:57   13-10-2021
Image Description
Արդարադատության փոխնախարարն ընդունել է Եվրոպայի խորհրդի պատվիրակությանը
Թողնել մեկնաբանություն

Արդարադատության նախարարի տեղակալ Սուրեն Գրիգորյանը հոկտեմբերի 13-ին ընդունել է աշխատանքային այցով Հայաստանում գտնվող Եվրոպայի խորհրդի Տեղական և շրջանային իշխանությունների կոնգրեսի քարտուղարության Համագործակցության և արտաքին կապերի բաժնի ղեկավար Դմիտրի Մարչենկովի և Երևանում ԵԽ գրասենյակի ղեկավար Մարտինա Շմիդտի գլխավորած պատվիրակությանը:

«Քննարկվել են Կոնգրեսի կողմից Հայաստանում 2019 թվականից իրականացվող տեղական մակարդակում կոռուպցիայի դեմ պայքարի ծրագրին և բաց կառավարման սկզբունքի կիրառմանն առնչվող մի շարք հարցեր: Փոխնախարարն իր խոսքում վերահաստատել է, որ հակակոռուպցիոն քաղաքականությունը եղել և մնում է Կառավարության գործունեության առաջնահերթություններում և ներկայացրել  է Արդարադատության նախարարության կողմից իրականացվող Հակակոռուպցիոն ռազմավարությունից բխող գործողությունները»,- «Արմենպրես»-ի փոխանցմամբ՝ տեղեկացնում են նախարարությունից:

Հանդիպմանն անդրադարձ է եղել նաև միջազգային գործընկերների կողմից մշակված տեղական մակարդակում կոռուպցիոն ռիսկերի ինքնագնահատման գործիքի կիրառմանը և դրա արդյունավետությանը, ինչպես նաև քննարկվել են ազգային և տեղական մակարդակներում կոռուպցիայի դեմ պայքարի խթանմանն ուղղված այլ հարցեր՝ հակակոռուպցիոն կրթության և հանրային իրազեկվածության բարձրացման միջոցով:

Հանդիպման ավարտին կողմերը սերտ համագործակցության պատրաստակամություն են հայտնել և աշխատանքային հանդիպումների վերաբերյալ պայմանավորվածություն են ձեռք բերել:

Loading...