Պատգամավորները ՀՀ ԿԳՄՍ նախարարի տեղակալ Կարեն Թռչունյանի ներկայացմամբ ԱԺ նիստում առաջին ընթերցմամբ ընդունեցին Կառավարության հեղինակած «Զինվորական ծառայության և զինծառայողի կարգավիճակի մասին» ՀՀ օրենքում առաջարկվող լրացումները:
Օրենքի 67-րդ հոդվածը լրացվում է նոր մասով. «Պետությունը Հայաստանի Հանրապետությունում գործող հավատարմագրված ուսումնական հաստատությունների վճարովի համակարգի այն սովորողներին, որոնք ուսումնառության ընթացքում ձեռք են բերել սույն հոդվածի 1-ին մասով նախատեսված կարգավիճակ, տրամադրում է ուսանողական նպաստի ձևով ուսման վճարի լրիվ փոխհատուցում` ՀՀ Կառավարության սահմանած կարգով»:
Հիշեցնենք, որ վերոնշյալ օրենքի 67-րդ հոդվածով սահմանված է, որ «Պետությունը երաշխավորում է ժամկետային պարտադիր զինվորական ծառայության ժամանակ ծառայողական պարտականությունները կատարելիս 1-ին կամ 2-րդ խմբի հաշմանդամության զինվորական կենսաթոշակի իրավունք ունեցող նախկին զինծառայողների, ինչպես նաև զոհված (մահացած) զինծառայողների ծնողների, ամուսնու (կնոջ) մինչև 27 տարեկան զավակների ընդունելությունը ՀՀ Կառավարության սահմանած ցանկում ընդգրկված Հայաստանի Հանրապետությունում հավատարմագրված ուսումնական հաստատություններ` ընդհանուր մրցույթից դուրս, առանձին մրցույթով, քննությունները դրական միավորներով հանձնելու դեպքում, ՀՀ պետական բյուջեի միջոցների հաշվին` ՀՀ Կառավարության սահմանած կարգով»:
Հարակից զեկույցում ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի անդամ Հակոբ Ասլանյանը բարձրաձայնել է հանձնաժողովի դրական եզրակացությունը:
Պատգամավորներն իրենց ելույթներում ողջունել են նախաձեռնությունը, ներկայացրել մի շարք առաջարկներ:
