Միացյալ Նահանգների իշխանությունները կանգնեցրել են Ռուսաստանից դեպի Նոր Օռլեան քաղաք (ԱՄՆ Լուիզիանա նահանգ) ուղևորվող նավթատար լցանավը։ Այս մասին երեքշաբթի հայտնել է The Wall Street Journal-ը՝ հղում անելով աղբյուրներին։
Թերթի տվյալներով՝ լցանավը պատկանում է հունական TMS Tankers Ltd ընկերությանը և վարձակալվել է շվեյցարա-հոլանդական նավթային Vitol ընկերության կողմից։ Հրատարակության տվյալներով՝ լցանավը կիրակի պետք է ժամաներ Նոր Օռլեան։
Հրատարակության աղբյուրների և բեռնափոխադրումների տվյալների համաձայն՝ ԱՄՆ իշխանությունները թույլ չեն տվել լցանավը բեռնաթափել։ The Wall Street Journal-ի զրուցակիցներից մեկի և ԱՄՆ առափնյա պահպանության պաշտոնյայի խոսքով, ներկայումս լցանավը ստուգվում է ԱՄՆ մաքսային և սահմանային պաշտպանության աշխատակիցների կողմից։
Vitol-ի ներկայացուցիչը թերթին ասել է, որ ընկերությունը գործում է «բոլոր կիրառելի օրենքներին և կանոնակարգերին համապատասխան՝ ներառյալ պատժամիջոցները»՝ հրաժարվելով թեմայի վերաբերյալ այլ մեկնաբանություններից: Իրենց հերթին, TMS Tankers-ի ներկայացուցիչները հրաժարվել են մեկնաբանել հաղորդագրությունը։