Ռուսաստանից ներկայիս միգրացիոն հոսքը առավելություն է տալիս Հայաստանին։ Այս մասին NEWS.am-ի հետ զրույցում ասաց ՀՀ միգրացիոն պետական ծառայության նախկին պետ Գագիկ Եգանյանը։
Նա հիշեցրեց, որ ի տարբերություն Վրաստանի՝ Հայաստանը ռազմական հակամարտություն չի ունեցել Ռուսաստանի հետ։
Վրաստանի, ինչպես նաեւ Ադրբեջանի նկատմամբ մյուս էական առավելությունն այն է, որ Հայաստանում ռուսաստանցիներին աշխատանքային թույլտվություն պետք չէ, ինչը պայմանավորված է ԵԱՏՄ-ին անդամակցությամբ։
ԵԱՏՄ-ից դուրս գտնվող երկրների քաղաքացիների դեպքում նման թույլտվությունը պարտադիր է։
Եգանյանը հավելեց, որ Հայաստանը մրցակցային առավելություններ ունի նաեւ Ղազախստանի նկատմամբ, որտեղ սրվել են հակառուսական տրամադրությունները։
«Պետք է մտածենք կրթական հաստատությունների ենթակառուցվածքների բարելավման մասին, որպեսզի այցելող ռուսաստանցիները կարողանան իրենց երեխաներին տանել ռուսական մանկապարտեզներ եւ դպրոցներ, պետք է մտածել նման քաղաքացիներին տեղեկատվական աջակցություն տրամադրելու ծառայությունների ընդլայնման մասին եւ ստեղծել թեժ գիծ։
Կարեւոր է նաեւ նվազագույնի հասցնել նման քաղաքացիների նկատմամբ խարդախության դեպքերը, հետեւողական լինել նման հանցագործությունների բացահայտմանը եւ խստագույն պատիժ սահմանել»,-խորհուրդ տվեց Եգանյանը։