Ղազախստանի նախագահ Կասիմ-Ժոմարտ Տոկաևը Երևանում Հավաքական անվտանգության պայմանագրի կազմակերպության (ՀԱՊԿ) գագաթնաժողովում հույս է հայտնել, որ ռուսական կողմի խաղաղապահ ջանքերը թույլ կտան կարգավորել հայ-ադրբեջանական հակամարտությունը:
Երկրի ղեկավարի մամուլի ծառայության հաղորդագրության համաձայն՝ Տոկաևը, ելույթ ունենալով գագաթնաժողովում, պաշտպանել է հայ-ադրբեջանական հակամարտության դիվանագիտական կարգավորմանն ուղղված քայլերը:
«Մենք բոլորս շահագրգռված ենք Հայաստանի և Ադրբեջանի միջև հարաբերությունների կարգավորմամբ։ Հուսով ենք, որ ռուսական կողմի խաղաղարար ջանքերը թույլ կտան կարգավորել հայ-ադրբեջանական հակամարտությունը բացառապես քաղաքական-դիվանագիտական ճանապարհով»,-ասված է Տոկաևի հայտարարության մեջ։
Տոկաևը հույս է հայտնել, որ Երևանի ու Բաքվի միջև խաղաղության պայմանագիր կստորագրվի:
