Հայաստանի Հանրապետության 96 դպրոցի շենքային պայմանները և գույքային հագեցվածությունը բարելավելու նպատակով ՀՀ կրթության գիտության մշակույթի և սպորտի նախարարությանը 1 միլիարդ 933 միլիոն դրամ գումար կտրամադրվի:
«Արմենպրես»-ի հաղորդմամբ` նախարար Վահրամ Դումանյանը կառավարության նիստում ասաց, որ նախագծով գումար կհատկացվի նաև Գեղարքունիքի և Վայոց ձորի մարզի որոշ դպրոցների գույքով ապահովելու նպատակով:
«Այս աշխատանքները հնարավորություն են տալիս լուծել դպրոցներում առկա հրատապ խնդիրները ` ջեռուցման, տանիքի և սանհանգույցների վերանորոգման տեսանկյունից»,-ասաց նա:
Դումանյանի խոսքով` կառավարության նիստում չզեկուցվող հարցերում ընդգրկված երկու որոշումներով ևս 8 մանկապարտեզ և 13 դպրոց գույքով կապահովվի:
Վարչապետ Նիկոլ Փաշինյանն էլ հավելեց, որ հանրակրթության ոլորտում ռազմավարական ներդրումներ իրականացնելու որոշման թափանիվը սկսել է շարժվել:
«Մենք սկսել ենք խոշոր ներդրումներ անել հանրակրթության, ինչպես նաև նախադպրոցական կրթության ոլորտներում»,-ասաց Փաշինյանը:
