«Երևանի հասարակական տրանսպորտի ոլորտում տեղի են ունենում մեծ փոփոխություններ, և, ինչպես գիտեք, որոշ դեպքերում դա խնդիրների է հանգեցնում, բայց դրանք վստահաբար ժամանակավոր են», - «Դպրոցականների ավագանու» նիստին ասաց Երևանի փոխքաղաքապետ Տիգրան Ավինյանն՝ արձագանքելով աշակերտներից մեկի՝ տրանսպորտային երթուղիների վերաբերյալ զեկույցին։
Ավինյանի խոսքով՝ Երևանում, ընդհանուր առմամբ, շատ կարևոր հարց է լուծվում․ «Մեր հին «գազել»-ների փոխարեն գծեր ենք ներմուծում նոր, որակյալ ավտոբուսներ։ Վերջերս նույնիսկ գերմանական «MAN» ավտոբուսներ ենք ձեռք բերել։ Այդ ավտոբուսները նույնպես ծառայելու են Երևանին և երևանցիներին։ Իհարկե, այն անհարմարությունները, որոնք այս ընթացքում կան, ունեն պարզ լուծում․ ապագայում կլինի միասնական տոմսային համակարգ, որը կգործի բոլոր ավտոբուսներում»։
