Երևանի քաղաքապետարանը «Էրեբունի-Երևան-2806» տոնակատարությունների անցկացման համար կնքել է 49 պայմանագիր, որոնց ընդհանուր գումարը կազմում է ավելի քան 600 միլիոն դրամ: Այս մասին Երևանի քաղաքապետարանից տեղեկացանք մեր գրավոր հարցմանն ի պատասխան:
Պայմանագրերի ուսումնասիրությունից պարզ է դառնում, որ քաղաքային բյուջեից ծախսվել են բավականին մեծ գումարներ տարբեր արտիստների և մշակութային գործիչների ելույթներ կազմակերպելու համար:
Այսպիսով՝ Ազատության հրապարակում և Կասկադ համալիրի տարածքում համերգների կազմակերպման տեխնիկական միջոցների վարձակալության և սպասարկման ծառայությունների համար «Սթեյջ Դիզայն» ՍՊԸ-ի հետ կնքվել է համապատասխանաբար 25 000 000 և 20 000 000 դրամ արժողությամբ ծառայությունների մատուցման պայմանագրեր:
«Սթեյջ Դիզայն» ՍՊԸ-ի տնօրենը Բագրատ Դիվանյանն է։ Նշենք, որ Դիվանյանը ոչ միայն «Սթեյջ Դիզայն» ՍՊԸ-ի հիմադիրն է, այլև Jellyfish Yerevan ժամանցի կենտրոնի գործադիր տնօրենը, որն, ըստ մամուլում առկա հրապարակումների, պատկանում է ՔՊ-ական բարձրաստիճան պաշտոնյաներից մեկին։
Պայմանագրերն այսքանով չեն ավարտվում, ավելին՝ գները բարձրանում են:
«Սթեյջ Սթայլ» ՍՊԸ-ի հետ կնքվել է ավելի քան 40 000 000 դրամի պայմանագիր, որով կատարողը պատրավորվել է քաղաքի տարբեր հատվածներում ապահովել դեկորատիվ սեգմենտների պատրաստման, մոնտաժման ու ապամոնտաժման և բեմի քողարկման աշխատանքների իրականացում:
«Իվենթ Պլատֆորմ» ՍՊԸ-ի հետ էլ կնքվել է 20 000 000 դրամ արժողությամբ պայմանագիր՝ Երևանի Դիանա Աբգարի անվան զբոսայգում ռոք համերգի կազմակերպման համար ապահովելով տեխնիկական միջոցների առկայություն:
Պայմանագրերից թերևս ամենաուշագրավը «Ֆակտորի Փրոդաքշն» ՍՊԸ-ի հետ կնքվածն է: Արժեքը՝ 304 487 577 դրամ: Պայմանագրով քաղաքապետարանը պատվիրել է միջոցառման շրջանակում 2024 թվականի հոկտեմբերի 13-ին Գաֆէսճեան քանդակների պարտեզի տարածքում, Երևանի Ազատության հրապարակում, Երևանի Դիանա Աբգարի անվան զբոսայգու տարածքում, Շառլ Ազնավուրի անվան հրապարակում և Հանրապետության հրապարակում կազմակերպել համերգային ծրագրեր, հայաստանյան հայտնի երաժշտախմբերի ու անհատ արտիստների մասնակցությամբ: Ինչպես նաև Երևանի Սախարովի հրապարակի տարածքում կազմակերպել սպորտային ուղղվածության ծրագիր: Սրան զուգահեռ միջոցառման շրջանակում անհրաժեշտ է եղել Երևանի Հյուսիսային պողոտայի և Դիանա Աբգարի անվան զբոսայգու տարածքում կազմակերպել նաև գինու և գարեջրի փառատոններ:
Շարունակելով քաղաքապետարանի կնքած պայմանագրերի շարքը նկատում ենք, որ հաղորդավար Աննա Ավանեսյանին 3,5 ժամվա համար քաղաքային բյուջեից վճարվել է 1 000 000 դրամ: Իսկ հաղորդավար Վահե Խանամիրյանին վճարվել է 700 000 դրամ այն պարագայում, երբ նա Շառլ Ազնավուրի հրապարակում պետք է վարեր էստրադային համերգ 5 ժամ:
Թե ի՞նչ չափորոշինչեր են գործել պայմանագրերի գնային սանդղակները որոշելիս Երևանի ավագանու Մայր Հայաստան խմբակցության ղեկավար Մանուկ Սուքիասյանն ասում է.
«Ենթադրում եմ, որ յուրաքանչյուր երգիչ ինքն իր ելույթը գնահատել ու պահանջ է դրել՝ քաղաքային իշխանությունն էլ ընդառաջել է»:
10 530 000 դրամ է արժեցել Հյուսիսային պողոտայում գինու և Դիանա Աբգարի անվան զբոսայգում կայանալիք գարեջրի փառատոնների շրջանակներում գինի, գարեջուր կամ սնունդ արտադրող ընկերությունների հավաքագրման աշխատանքները: Իսկ երգիչ Էրիկ Կարապետյանի ելույթը Հանրապետության հրապարակում քաղաքային բյուջեի համար աժեցել է 1 579 000 դրամ:
Հատկանշական է, որ երգիչների հետ կնքած պայմանագրերում նշված է եղել ելույթի առնվազն 2 րոպե տևողությունը: Երգչուհի Նունե Եսայանի ելույթի համար Երևանը վճարել է 1 268 800 դրամ: Իսկ երգիչ Տիգրան ժակոչյանինը՝ 1 305 600 դրամ: Երիտասարդների կողմից հաճախ լսվող 3.33 խմբի ելույթի համար նրանց վճարվել է 2 105 300 դրամ:
Ընդդիմադիր խմբակցության ղեկավարը ենթադրում է նաև, որ այս ամենը կարող է եղած լինել բանակցային գործընթացի արդյունքում: Շեշտում է. «Բաշխված թվերից կարելի է նկատել, որ գների սակարկում չի եղել, ով ինչ թիվ ասել է, այդքան էլ պատրաստակամ ձևով վատնել են քաղաքային բյուջեն»:
Ալբերտ Ավետիսյան
