Ռուս ընդդիմադիր գործիչ Ալեքսեյ Նավալնին, որը Բեռլինի կլինիկաներից մեկում ապաքինվում է «Նովիչոկ» տեսակի նյութով թունավորումից հետո, առաջադրվել է Խաղաղության Նոբելյան մրցանակի: Այս մասին տեղեկանում ենք ամերիկյան Ռաթգերս համալսարանի պրոֆեսոր Սերգեյ Երոֆեևի ֆեյսբուքյան էջից:
«Ճանաչված համալսարաններից Ռուսաստանով զբաղվող մի շարք պրոֆեսորներ Նավալնիին առաջադրել են Խաղաղության նոբելյան մրցանակի»,-գրել է պրոֆեսոր Երոֆեևը:
Նրա խոսքերով` այս գաղափարին աջակցող գիտնականների մեջ կան այնպիսիք, որոնք նախկինում բացասական վերաբերմունք ունեին Նավալնիի գործունեության նկատմամբ, բայց փոխել են իրենց կարծիքը:
Երոֆեևը բացատրել է, որ համապատասխան պրոֆիլի ցանկացած պրոֆեսոր կարող է դիմել Նոբելյան մրցանակի առաջադրման համար:
Հիշեցնենք, որ Նավալնիի ինքնազգացողությունը կտրուկ վատացել էր օգոստոսի 20-ին Տոմսկից Մոսկվա թռչելիս: Նրան տեղափոխող ինքնաթիռն արտակարգ վայրէջք էր կատարել Օմսկ քաղաքում, ուր նրան հոսպիտալացրել են շտապ օգնության թիվ մեկ հիվանդանոց: Հիվանդանոցի մասնագետները Նավալնիի օրգանիզմում թույնի հետքեր չէին հայտնաբերել: Ըստ նրանց՝ հետազոտությունները միայն ալկոհոլի և կոֆեինի հետքեր են ցույց տվել: Հայտնի է, որ չվերթից առաջ Նավալնին թեյ է ըմպել օդանավակայանի սրճարանում:
Օգոստոսի 22-ին Նավալնիին ինքնաթիռով տեղափոխել են Բեռլինի Charite հիվանդանոց, որի մասնագետներն ավելի ուշ հայտարարել էին վերջինիս թունավորման մասին, իսկ Գերմանիայի զինված ուժերի մասնագետները մաշկի, արյան և մեզի նմուշների մեջ «Նովիչոկ» խմբին պատկանող թունավոր նյութի հետքեր էին հայտնաբերել:
Գրում է՝ Tert.am -ը:
