2020 թվականի մայիս ամսին «Հրանտ Դինք» հիմնադրամին և մասնավորապես պոլսահայ երջանկահիշատակ լրագրող Հրանտ Դինքի կնոջը` Ռաքել Դինքին և հիմնադրամի իրավաբան Ֆեթհիյե Չեթինին մահվան սպառնալիքով նամակներ ուղարկած երկու անձինք դատական երկրորդ լսումից հետո ազատ են արձակվել: Այս մասին գրում է Gazete Karınca պարբերականը:
Մեղադրյալներ Հուսեյին Աթեշին և Էրսին Բաշքանին մեղադրանք էր առաջադրվել «շղթայական սպառնալիքներ» իրականացնելու համար:
Մեղադրյալները ներկա են եղել դատական նիստին: Մեղադրանքը կարդալուց հետո ելույթ է ունեցել Էրսին Բաշքանը.
«Ես ընդամենը պատասխան նամակ եմ ուղարկել, երբ տեսել եմ «Հրանտ Դինք» հիմնադրամի մամուլի հաղորդագրությունը: Ես չեմ ընդունում մեղադրանքն ու արդարացում եմ պահանջում»,-հայտարարել է Բաշքանը:
Բաշքանից հետո խոսքի իրավունք է տրվել երկրորդ մեղադրյալին: «Մինչև իրարձությունները ես շոկի մեջ էի ընկել համացանցում առկա տեսանյութերից: Ես հոգեմետ դեղեր եմ ընդունում: Այդ օրը չէի ընդունել: Ես չէի ուզում սպառնալ, ընդամենը երբ տեսա, որ վիրավորում են Թուրքիայի դրոշը, պատասխանեցի: Այստեղ ես նույնպես դեղեր եմ ընդունում, նույնիսկ ավելացրել են չափաբաժինը»,-հայտարարել է Աթեշը:
«Հրանտ Դինք» հիմնադրամի փաստաբանները հարցեր են ուղղել մեղադրյալներին, մասնավորապես այն մասին, թե ինչու են թիրախավորել հենց Ֆեթհիյե Չեթինին, ինչին ի պատասխան մեղադրյալներից մեկը նշել է, որ Չեթինին անձամբ չի ճանաչում, միայն նրա հայտարարություններին է ծանոթ և չի ցանկացել սպառնալ: Փաստաբաններից մեկը հիշեցրել է, որ նման սպառնալիքներ հնչել են նաև մինչև Դինքի սպանությունը և դրանք կարող են վտանգավոր լինել:
Միևնույն ժամանակ, մեղադրյալ Աթեշը պատրաստակամություն է հայտնել ներողություն խնդրել հիմնադրամից:
Չնայած նրան, որ դատախազը միջնորդություն է ներկայացրել, որ մեղադրյալները շարունակեն մնալ կալանքի տակ, դատավորը, այնուամենայնիվ, դատաբժշկական ստուգման հիման վրա, որը հաստատել էր, որ մեղադրյալները հոգեկան խնդիրներ ունեն, որոշել է ազատ արձակել նրանց:
Հունիսի սկզբին Հրանտ Դինք» հիմնադրամի փաստաբան Ֆեթհիյե Չեթինը հայտնել էր, որ Դինքի կնոջը և իրեն ուղղված նամակներում իրենց մահվամբ են սպառնացել:
Գրում է՝ Tert.am -ը:
